Танара үрэххэ субуотунньук

Танара үрэххэ субуотунньук

15:29
19 июня 2017

Ыам ыйын 25 күнүгэр Бүлүү өрүс күнүгэр сөп түбэһиннэрэн Дьөккөн нэһилиэгэ Танара үрэххэ субуотунньуктаатыбыт. Танара үрэх барахсан мууһа көтөҕүллэн, ыраастанан биһигини  үөрэ-көтө көрүстэ. Субуотунньукка “Ыллыкчаан” оҕо уһуйаанын, олохтоох дьаһалта, Советскай Союз Геройа Н.А. Кондаков аатынан оскуола уонна “Сарыал” кулууп үлэһиттэрэ сырыттылар.

Танара үрэҕинэн «Бүлүү» федеральнай суол ааһарынан сибээстээн айаннаан иһэр суол дьоно тохтоон Танара үрэххэ сүгүрүйэн ааһаллара былыр былыргыттан аныгы кэмнэ дылы тиийэн кэлбит үгэс буолар. Сорох массыыналар алдьанан да ааһар түбэлтэлэрэ баар буолааччылар.

Ол ааһан иһэр дьоннорго усулуобуйа суоҕунан сибээстээн ойуурга тахсан чэпчэтинэр түбэлтэлэрэ тахсар. Айаннаан иһэр дьон сиэбит хампыаттарын суута, пластиковай бытыыккалара, араас бөх-сыыс мунньуллубута барыта хаар ууллан тахсан кэлбитин субуотунньук дьоно нэһиилэ ыраастаатыбыт. Умайыахтаах бөҕү-сыыһы барытын уматтыбыт. Араас тимири уонна умайбат бөҕү барытын Танара үрэххэ баар база харабыла Степан көмөтүнэн кумаҕынан дьаамаҕа көмтүбүт.

Онон сибээстээн биһиги дьөккөттөр икки этиилээхпит:

  1. Федеральнай суол буоларынан сибээстээн туалет тутуохха уонна мусорнай  тимир баахтары туруоруохха, суол үлэһиттэрэ көрө-истэ сырыттыннар.
  2. Суолунан айаннаан иһэр дьоннор Танара курдук улахан суолталаах үрэҕи сыыһырдымыаҕын! Ийэ айылҕабытын, төрөөбүт түөлбэбитин харыстыаҕын диэн ынырабыт!

Степанов Н.Г.“Дьөккөн нэһилиэгэ” МТ баһылыгын солбуйааччы